ചില ചിരികളുണ്ട് 

കടലാഴങ്ങൾ നെഞ്ചിലൊളിപ്പിച്ചു 

കണ്ണുനീർപ്പുഴ  മിഴികളിൽ താഴ്ത്തി  

തൊണ്ടയൊരല്പവും ഇടറാതെ 

നേർത്തകാറ്റിന്റെ മൃദുമർമ്മരം പോലെ 

ചില ചിരികളുണ്ട് 

വിതുമ്പിപ്പോയേക്കുമെന്ന ഉൾഭയത്തിൽ  

ഇടയ്ക്കിടെ ശബ്ദം കൂട്ടി 

കണ്ണുകൾ പാതിയടച്ചു 

ശ്വാസമെടുക്കാനാവാതെ ആയാസപ്പെട്ട് 

ചില ചിരികളുണ്ട് 

മുറിവേറ്റ ഹൃദയത്തിൽ നിന്നും 

ഇറ്റുവീഴുന്ന ചോരത്തുള്ളികൾകൊണ്ട് 

അസ്തമയസൂര്യ കിരണങ്ങൾ പോലെ 

മുഖം തുടുപ്പിച്ചു ചൊടി  ചുവപ്പിച്ചു

ചില ചിരികളുണ്ട് 

നിസ്സഹായതയുടെ നോവിനുള്ളിൽ നിന്നും 

നമ്മളിടങ്ങളുടെ അസാന്നിധ്യത്തിൽ 

പകുത്തെടുക്കുവാനാരുമില്ലാത്ത 

ശൂന്യതയുടെ തമോഗർത്തങ്ങളിൽ  

നിനക്കുമാത്രം മനസ്സിലാവുമെന്ന് ഞാൻ വൃഥാ  കരുതുന്ന

 ചില ചിരികൾ..

ചില നിറകൺ ചിരികൾ...