കാത്തിരുപ്പ്.....

എഴുതാൻ മറന്നതല്ല , മനസിന്റെ
നനവുകൾ വറ്റിയതുമല്ല .
ഇരുളും വെളിച്ചവും പതിവുപോൽ
ഇഴമാറി വന്നിടുമ്പോൾ
പകലുകൾ നടന്നു തീർക്കു മ്പോൾ
ഇരുളിന്ടെ തണലിൽ മിഴികളടയുമ്പോൾ
തൂലിക പിടിക്കുവാനാവാതെ വിരലുകൾ
തീരെ തളർന്നു മരുവുമ്പോൾ
വാക്കുകൾ മനസ്സിൽ പിറക്കുന്നു മരിക്കുന്നു
വിളർത്തൊരീ കടലാസ്സിൽ പിറവി കൊള്ളാതെ

ചിലനേരം മനസ്സിലൊരു കാർമേഘം
രൗദ്ര ഭാവമാർന്നുടലെടുക്കുന്നു ...
ഒരു പേ മാരിയായ് പെയ്യുവാനാകാതെ
വീർപ്പുമുട്ടുന്നു , വിതുമ്പുന്നു
പിന്നെവിടെയോ ചിരിതൂകുന്ന പൂമൊട്ടായി
പൂവായി വിടരാനുമാകാതെ
കൊഴിഞ്ഞമരുന്നു , ഈയാമ്പാറ്റ പോൽ തീരുന്നു

സുഹൃത്തേ, ഞാൻ എഴുതാൻ മറന്നതല്ല
എൻ മനസ്സിലെ കവിതകൾ വറ്റിയതുമല്ല
കൊഴിഞ്ഞൊരീ ശിഖരത്തിൽ
തളിർ പൊട്ടിവിരിയുവാൻ
ഞാനും കാത്തിരിക്കുന്നു ..
മൌനമൊരു കൂട്ടായി മറയുന്നു..