ഡിസംബർ....
നിനക്ക് പ്രണയത്തിന്റെ ഗന്ധമാണ് ,
മഞ്ഞുമൂടിയ വഴിയോരങ്ങളിൽ
ഇലപൊഴിഞ്ഞ മരങ്ങൾക്കു കീഴെ
ഏതോ ദേശാടനക്കിളി പൊഴിച്ചിട്ട
തൂവലിനും അതേ ഗന്ധമാണ് .

ഡിസംബർ......
നിന്റെ പുലരികൾക്കു
എന്തു ഭംഗിയാണ്
പുൽത്തുമ്പുകളിൽ അടരാൻ വെമ്പിനിൽക്കുന്ന
ഹിമകണങ്ങളുടെ കുളിരിനും
ഗൃഹാതുരത്വത്തിന്റെ  നോവുണർത്തുന്ന
സന്ധ്യയ്ക്കും അതേ ഭംഗിയാണ്.


ഡിസംബർ....
നീയെനിക്കു സമ്മാനിക്കുന്നത്
ഓർമ്മകളുടെ പൂക്കൂടകളാണ്
അറിഞ്ഞിട്ടും അറിയാതെപോയ
കൊതിച്ചിട്ടും പറയാതെ പലവുരു മാറ്റിവെച്ച
വാക്കുകളുടെ , എരിയുന്ന കനലുകളുടെ
അതേ പൂക്കൂടകൾ ..

ഡിസംബർ ...
കൊഴിഞ്ഞടങ്ങിയ  സ്വപ്നങ്ങളുടെ
ശവകുടീരങ്ങളിൽ നിന്നും
പുതിയവയുടെ പണിപ്പുരകളിലേക്കു
നമുക്കൊരു യാത്രപോകാം
മൗനം കനക്കുംമുമ്പേ,
പ്രണയം നെഞ്ചിലൊളിപ്പിച്ചു
പുതിയ പുലരികളിലേക്കു
നമുക്ക് മാത്രമായ് ഒരു യാത്ര .